Kuva i piše:

Marija Đukanović

Često pravim rižoto sa povrćem jer djeca i muž vole. Pravila sam ga pred maraton jer je trebalo unijeti energije, pa je ostalo i viška koji sam čuvala u frižideru i odlučila da ga zapečem u pamidorama.

Ja ga uvjek pravim količinu za par dana pa prilagodite sebi:

• 100 gr riže
• 1 kapula
• 1 manja tikvica
• 1 paprika
• 2 sake sjeckanih šampinjona
• 4 pamidore
• origano
• bosiljak
• maslinovo ulje
• čen bijelog luka
• so, biber ili čili

Kad god grilujem povrće uvjek to radim zasebno, jer mi nekako bude ukusnije.

Isjeckati svo povrće ( sem pamidora, naravno, i bijelog luka) na sitne kockice i propržiti svako pojedinačno. Ja to nekad radim na suvom tiganju a nekad na malo maslinovog ulja.

Rižu koju kupujem inače skuvam u slanoj vodi na pola, jer se kuva 45 minuta, začinim i pomiješam sa grilovanim povrćem i dodam sjeckani cešnjak.

Pamidorama otkinuti “poklopac”, izdubiti im meso kašikom i poređati ih u podmazan sud.

“Meso” koje smo izdubili stavimo u blender i napravimo paradajz sos kojem dodamo malo bosiljka i origana. Pola sipamo u rižoto, pola ostavimo za sok u kojem će se pamidore krčkati. Napuniti pamidore rižotom, poklopiti, posuti ostatkom paradajz sosa, malo maslinovog ulja i peci nekih 30 minuta na 200 stepeni u već zagrejanoj rerni.

PS. Ovo je odlično jelo za one koji su van restrikcije. Ili za one koji poste. Mada, ljudi na restrikciji ni u vreme posta ne bi trebalo da jedu rižu, već bi paradajz mogli da napune samo dinstanim povrćem i eventualno kinoom.